上海老底子每天呈送精彩文章一组
打开尘封的记忆，寻觅往昔的岁月
叙上海老底子事忆上海老底子人
诉上海老底子情
“菜剑”搭上海方言来源：新民晚报
作者：褚半农
改写、讲述：牛美华
审阅、推荐：丁迪蒙
编辑：王乙其
每年交过立春之后，青菜类蔬菜个菜心开始拔节，准备抽薹了，惊蛰前后更加是进入了抽薹旺季。农民会得拿往上长个菜薹摘脱炒来吃或上市供应。菜薹，只要是种植搿类蔬菜个地方侪有个，但是各地个称呼勿一样，有个地方叫菜心，有个地方就叫菜薹。勒上海方言当中叫啥呢？是菜ji。葛带来了一个问题，字哪能写呢？
按照形旁+声旁个造字原则，应该写成“苋”个，草字头表示是种植物，“见”是读音，形音一致，应该是交关和谐个“配对”。但是啊，自古以来伊就拨“委以重任”，成为“苋菜”个专用字，读音呢，定为“显”了。
祖先面对现实，根据菜薹个形状写成功“菜剑”。讲是“剑”，也通个，两者倒有相像之处，一节一节往上拔个“薹”还真有眼像“剑”，最主要个，是读音也对，迭个名称也就一代代传下来了。
各种书里也屡有记载，我伲可以从清代文献当中先看两个例句，分别是浦东搭仔嘉定个：“一种乌菘，俗呼油菜，春撷其苔为菜剑……”（秦荣光《上海县竹枝词》）“菜，以芸薹之为用最广……春初摘其茎以为食，名曰菜剑”（《望仙桥乡志续稿》卷五）。
就是菜剑，勒地方语言里还有勿同个说法，第一趟摘个称头剑，再长出来个称二剑。而“二剑”迭个词，居然勒地方旧志当中也好寻到书证，今属上海宝山个清代《月浦志》当中有例句：（油菜）“春初生薹……摘后再发者曰二剑”（卷之九）。头剑粗而长，品质明显优于二剑。当然，摘了二剑后还会得长出三剑、四剑，只不过搭头剑相比，是一剑勿如一剑。还有，迭个辰光已经到了开花季，搿些“剑”就侪勿去吃伊了。
浦东陈行人秦荣光学识渊博，著述邪气多，自然晓得“苋”在《说文解字》当中就是“苋菜也”，读音也勿对，所以伊写作“菜剑”。本文所引书证及我电脑库里个例句，侪是“剑”字当头。收词多条个《明清吴语词典》中，有勿少同一方言词个异形词，但“菜剑”只有一条。勒我阅读范围里，也还没看到历史文献中“菜苋”书证，搿或许说明伊本来就应该写作“菜剑”也未可知。
菜剑是种邪气好个食材，吃口甚至比原菜还要好。但勿是所有个菜剑侪可以摘来吃个，最具食用价值个有两种：藏菜搭油菜。藏菜是青菜个原名，每年勒小菜场浪个小贩侪好看到菜剑。需要解释个是油菜，搿种油菜搭现在农村普遍种植个油菜名字相同，但勿是同一种菜，千万勿好混淆。
现在个油菜是年初引进新品种之后勿断改良定型个，当年称胜利油菜，菜籽供榨油用，伊个优点是出油率高，缺点是搿种油菜勿好食用。为了区别搿两种菜，搿种油菜通常称本地油菜，是食用、榨油两用型蔬菜，上头第3条书证当中个油菜侪是个。本地油菜个菜籽出油率低，淘汰之后现在只勒自留地浪当作蔬菜少量种植。
菜剑除脱炒来吃之外，还可腌，方言称“盐菜”。青菜搭本地油菜个菜剑侪好腌来吃个，尤其以本地油菜个菜剑最灵。菜剑腌好之后个卤水稍作加工，就成了菜卤，鲜香味美，拿鸡蛋、鸭蛋白煠之后搭菜卤一道烧成菜卤蛋，鲜香味远胜过茶叶蛋。
最近几年，我好几趟看到媒体浪拿“菜剑”写成“菜苋”，使用者一般没考虑到“苋”字已作他用，只因形旁+声旁造字特点明显，因此，写“苋”邪气容易拨书写者接受，而网络也推波助澜，搿种写法几乎是普及了。长此以往，按照约定俗成个原则，伊会得成为上海方言当中新个异形词，也许最终可能成为一种语言现象，即只有一个读音个“苋”，勒上海方言当中成为了多音字，一个用于“米苋（显）”，一个用于“菜苋（记）”。
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年出版社
《实用沪语》复旦大学出版社
《上海话绕口令》少儿出版社
《上海方言词语使用手册》上海教育出版社
《上海话读成语故事》少儿出版社
《囡囡学童谣》，少儿出版社。
来源：“启迪心田沪语”